gescht hani DRS3 gloost, so schoen widr mol schwitzerduetsch z'ghoehre, do redi und hoehr zwar viel duetsch aber immer numme hochduetsch oder schriftduetsch oder wie me daem au immer seit.

Jetz hani grad zwei Stunde Comercio Exterior gha. DProfessorin betont immer das me bi ihre keini notitze mache muessi will alles im skript stoht, sowit sehr guet. Aber drfruer diktiert si umso lieber sache. Haen jetz grad 2 Stunde Spanischdiktat gha, oke fuer mi spanisch sicher nit schlaecht, aber irgendwie chunnt me sich komisch vor. Choennt doch ds Zueg eifach uffs netz tue oder usteile... naja

Morn gitz Streik do. Waege Bologna, jetz weiss niemer ob morn Uni isch oder nit. Irgendwie gitz anschienend sone system das dStudis vo de Vorlaesige choenne abstimme ob si dVorlaesig waenn oder nit (?), has nit ganz begriffe. Jedefalls haen si huet scho ummegschraue und Laerm gmacht waerend de Vorlaesige und ueberall haenge baskischi Plakat vo anschienend zum kampf uffruefe... was au immer das heisst. Cha no z'wenig baskisch zum so inhalt z'verstoh.

Morn zoobe/znacht gitz anschienend e Mister und Miss Erasmus Wahl do, im Bataplan (unter Spanier bekannt als Buscaplan). Vilicht gangi mol go luege ;-) choennt no luschtig si.

Am Frittig zoobe gangi denn nach Barca, juhuuu *freu* Nach mine letschte Informatione choemme Silli und Jessi, Jivi und Reto. Mol luege obi no cha Usgehtipps ufftriibe :-)

liebi gruess in di schoeni schwitz!
Nora

das sin biskischi Naeme. sin si nit wunderschoen? me gwoent sich aber mit dr zit drah... am afang hani no nach em dritte mol nochefrooge muesse uffgeh und eifach gseiht "Ahh" und e verstehends gsicht gmacht (hihi wie bim Jivan *erinner*) aber mittlerwiile kenni dnaeme und si wiederhole sich au zimmlich oft... me gwoehnt sich jo an alles ;-)

Huet isch e krasse Uni-Tag...vom 11i (aso eigentlich vom 10i aber das hani verschoobe) bis am 8i zoobe uni). Vo 11-12 Economia Española y mundial, momentan monetaers system vo dr EU, verstand grad nit so viel im momaent. Denn hani grad 2 Stund comercio exterior gha und dProfessorin isch vo ihrem Podescht abegheit... nei het sich nit wehgmacht, doerfsch unghemmt lache ;-). Schreeg ploetzlich kippt si nach vorne um und verschwindet hinter de bankreihe!
Jup und am 4i hani 2 Stund Spanisch... causal und consekutivsaetz. und denn no 2 stund baskisch: nik liburua dut= ich ha e buech!
Denn heim, aesse und denn go Jazzsession lose/luege und kalimotxo trinke. Das isch mi Tag huet.

Am morge bini no binere Bank gsi go frooge ob ich e Konto cha uffmache.... wiiiilll ich ha naemlich kei Pass. und fuer do e Konto uffmache bruch ich e Pass will ich nit EU bi. Grummel. Jetz muesi morn nomol verbigo zum luege ob si irgendwo e spezialabkomme finde mit dr Schwitz, waer jo immerhin moeglich.

Uuund :-) gescht hani s'erschte Wienachtsgschaenggli gchauft :-D
Im lidl verkaufe si schliesslich au scho Schoggisantichlaeus.

Aguuuuur

Nach diverse Ufforderige und nochfrooge ob ich ächt no läbi, glaubi, ich mues doch widr mol öbbis do ihneschriebe.

Mi internet deheim isch leider widr wäg. Das heisst für mi ich mues sWirelessnetz vom "kulturhuus" nutze, was wiederum heisst ich sitz grad im park vorem kulturhuus und schrib do fröhlich vor mi ahne. dLüt luege nit komisch, nei, aber ich bi mers jo gwöhnt. Wenn ich und dSuse mit unserne sexy surfsuits durch dStroose laufe (zum strand wohlgemerkt.. nit eifach so ohni grund!!) starre dLüt eim zum teil au ah. VIlich mues ich no drzuesaage dases do durchus nüt speziells isch wenn me type in surfsuits seht laufens, radelnd oder mofafahrend. Aber das sin halt type und keini mädels. blödi spanier!
blödi spanier, guets stichwort. Si hän mer nämlich au mit Velo gchlaut! und dank däne rateros hani denn au bekanntschaft mit dr polizei gmacht (ha müesse e azeig mache wäg dr versicherig).. peinlich ha nümme gwüsst wies genau ussgseh het. ha gmeint sig silbrig, aber naja dhälfti isch blau, hani denn i nochinein gmerkt (het do dutzendi vo däne velos, wills sbilligscht modäll isch im nögschte sportichaufszentrum.

Uni: gescht hämmer müesse matlab-code abtipe, vo dr tafele... uuuuh, aspruchsvoll!
und die nätti vorläsig wommer täglich 1 stund hän und vo däre stund 30 min läse (e wunder das nit öbber mues lut vorläse) und denn verzellt dr prof nomol was mer gläse hän... super! (aso nit das ich in däne 30 min dä text chönnt läse wo me denn mues läse, aber bitz öbbis meh uni-stilischs wär doch kuhl)
Drfür machi jetz no e baskischkurs! sehr luschtig.. chunnt mer bitz vor wie elbisch oder hobbitsprooch.
"Mutil txikia" (sagemer em Philli immer), "zer moduz?" (frogezeiche numme am ändi vo dr froog, was für e komischi sprooch ;-) )

Was gitz susch no z'verzelle? kei bsuech me (für mi) sit mim schwöschterli (obwohl si doch so guet wärbig gmacht het!) jo isch halt tüür zum do ahne cho und choschtet zit dr billigscht wäg z'finde.
Dr Phill het mol bsuech gha vonere "kollegin". Irgend e Schwöschter vo dr Fründin vom brueder vo dr Fründin oder so. Het si vorhä ei mol gseh und si chunnt ihn für 4 täg go bsueche, hihi. Hän die ganz zit holländisch gredet.. wenn si langsam rede verstoht me eigentlich ganz vill, aber si rede natürlich nie langsam... aber ich ha scho paar sache glernt, bispielswiis: "Je ziet er goed uit!" oder "Bel me, alstublieft". Sache wo me im tägliche läbe halt so bruucht. sSpanisch het sich nonig chönne duuresetze in dr WG... obwol mi spanisch gläb einiges besser isch als mi änglisch.

dSpanier läbe uf dr stroos.. vor allem zwüsche 6 und 9... mit kind und kegel. und was macht me denn wenn kind plötzlich e bedürfnis het z'schisse? naja für was gitz au boim... (mhm, het grad e vater sini tochter näbe mi an baum schisse loh, aso an boode näbene baum...)

ui dzit rennt.. mues heim, am 7i muesi vorem mac sii. d Sue het mit em Iñigo abgmacht und ich dörf si begleite will är eigentlic hsco mit emene kolleg abgmacht het.. irgendwie so. über baskischi näme schribi denn e andersmol ;-)

vermiss euch!
Nora

Hey, back in school again with internet connection :-)

SWeekend isch kuhl gsi, sunnig und gmuetlich. Am Samschtig simmer in Kino gange, weis nuem wie dr Film gheisse het, isch e daenische gsi, mit spanische untertitel. Do isch ebbe grad sFIlmfestival, drumm hets au bim Hotel Maria Cristina wo bi uns umme egge isch die ganz Zit Fans wo vor de temporaere abschrankige warte, Reporter mit ihrne Sateliteuebertragisautos und mit Kamerateams... :-)

Morn goemmer go Agua con Sal luege, weiss zwar nit um wases goht, aber schint e spanische film z'sii, also guet zum uebe verstoh. und sPlakat zum FIlm seht no huebsch uss.. e Frau am Strand.

Ich ha entdeckt (Gracias por el "tipp" hermanito ;-) ) das mit deheim 2 ungsichereti wireless netz haenn... aber momentan isch mi aku empty und drumm chani deheim trotzdaem nit surfe :-(, mues huet unbedingt go e adapter chaufe.. die haenn do naemlich keini 3 polige stecker, numme 2 poligi oder so komischi rundi mit so metalzueg am rand... denn chani au aendlich musig lose und CD's und mini andenk CD aluege :-D

Fuer EMails beantworte laengts mer jetz nuemm mues zrugg ind Stund (Wuerg; subjuntivo :-( ) aber ich schrib sicher morn oder huet zoobe wenn ich e adapter find fuer mi lappi.

macheds guet!

Besos

und allne wo no pruefige haenn ganz viel glueck!!!

PS: WI'ler sin dVPs eigentlich scho verbii? wie isch gange?

So huet isch widr Maentig, bi also scho meh als e Wuche do... chunnt mer eigentlich sogar no laenger vor, isch so viel passiert.

Huet zum Bischpiel bini bi mim Erasmus Koordinator gsi. Aer het mer denn dStundeplaen erklaert :-) (nachdaem aer nochgfrogt het was was beduetet). Die sin naemlich nit so uebersichtlich do. Es git naemlich ei Lischte mit vorlaesige. Doert hets links druff und wenn me glueck het findet me denn e beschriebig vo dr vorlaesig (zersch uff baskisch und denn uff spanisch ;-)). Denn hets e Horario wo me soett choenne luege zu was fuer zitte die vorlaesige sin. Die horarios sin pdfs mit zwuesche 17 und 23 Site! Doert druff sin denn alli Vorlaesige verzeichnet aaaaaber denn gitz no verschiedeni gruppe und je nachdaem in welere gruppe me isch isch das zueg zu unterschiedliche zitte.. (die gruppe cha ich als erasmus-special-VIP saelber waehle :-D, dnormalos waerde eifach iiteilt, haha) jedefalls sin denn die gruppe au nomol uffgsplittet irgendwie... naja witer weissi jetz au nonig, numme das ich mi au ersch nach dr erschte wuche cha immatrikuliere, das isch no kuhl denn chani dVorlaesige zersch mol aluege und aloose (nimmt mi jo wunder wieviel ich denn verstand). Mach morn nomol e versuech mit daem ganze zueg zkaempfe.

Irgendwenn nachdaem ich zNacht gchauft ha (couscous, gmuesmischig mit gambasm und wassermelon zum dessert :-) ) hani denn no 2 madrileños troffe wo mir den versuecht haenn s spanische R bi z'bringe, so richtig krass mit zungeuebige und zeichnige wi dZunge mues liege und so... ha denn nochaer no e halb stund luet gnaervt mit "RRRRRRRaúl" und "peRRRRRRRRo", natuerlich nit so wuerklich erfolgriich, aber vilich schaffis jo no in daem johr :)...

Vale, jetz muesi mol no mini Huusufgoobe mache und dr Compi freigeh....

vermiss euch!
Nora

Hey Luet,
ich maeld mi au mol, irgendwie isch do alles drunter und drueber gange und drumm chum ich erscht jetz mol dzue dae Webblog z'eroeffne (abgseh vo daene paar Iitraeg vorhaer :-) )
Aber jetz mol vo afang ah:
Letschte Sunntig bini do ahnegreist. Zersch mit em Zug nach Zueri uffe Flughafe, dennn nach Mallorca mit Airberlin und denn nach Bilbao, au mit Airberlin.. doert hani denn doefe mi Koffer go sueche will si e extraruum haen fuer Gepaeck wo nit us em EU Ruum chunnt!! Denn vo BIlbao Aeropuerto nach Bilbao und denn vo doert us nach SanSebastian. In San Sebastian het mer denn zum Glueck e Duetschi erklaert wi ich zu minere Jugi chumm (super mi riese Koffer, Taesche und Rucksack in daene bues, und denn hani au no ùesse umstiege... JEdefalls hani alles in alem oebbe 12 Stund gha zum do ahne cho (noegscht mol wird ich aernschthaft in betracht zieh mit em zug z'go!). BI denn au so kabutt gsi dassi denn numme no kurz an Strand bi go e Bocadillo (Sandwich) aesse (das isch e grundnahrigsmittel do!) und dr ussblick gniesse. Isch wuerklich dr Hammer do, megaschoen!
Denn dr 2. Tag Maentig, afang vom Sproochkurs: isch zum glueck numme 10 min vo minere Jugi waeg. Was aecht schlimm isch sin die ganze duetsche do, im Kurs hets sicher ueber 50% duetschi und die rede denn natuerlich au immer duetsch mitenand :-( so lernt me meeegaviel! Denn haemmer mol 3 Stund istefigstescht gha, zersch e stund schriftlich denn no oral...
Noch daem Tescht simmer denn zu 5 (Susann (D), Christian (I, aber duetschsproochig), Philippe (Belgie) und Patricia (Pole)) go Bocadillo aesse (mit tortilla, mmmm :) ) und denn haemmer agfange mit wohnig sueche (zu 4 will dPatricia scho e zimmer het). Mit ere Lischte vom Internacional Office do. Erschti Taktik isch gsi eifach go luette, kei so gueti Idee gsi het niemer uffgmacht. Denn haemmer agfange aluette, resp. ich ha agluette will ich am beschte spanisch ha choenne. So isches denn au no am Di witergange am morge Curso (bi im nivel superior :-), mit ganz viel duetsche :-/ wo zwar guet sin in grammatik aber ihri ussprooch ui ui und si rede halt au numme wenns noetig isch spanisch) und am nomittag wohnig sueche, das heisst dr ganz tag ummelaufe und aluette und wohnige go besichtige. SProblem do mit de wohnige sich eifach: 1. gitz viel zimmer mit ohni faenschter oder numme in sone quadratmeter grosse hinterhof. und 2. hets viel zimmer mit 2 bettr drin wo denn daemenstpraechend au fuer 2 choschte... nit so mi fall. Usserdaem mues me do e vertrag unterschriebe das me bis im Juni blibt, und jede wo izieht mues e vertrag unterschriebe. Naja zums churz mache, mir haen jetz e wohnig :-), im Zentrum halt ohni wohnzimmer drfuer mit grosser chuchi und grossem bad. 'mir' sin ich die duetschi Susann und dr Belgier, Philippe (aer cha zum glueck nit duetsch so redemer wenigstens aenglisch und nit duetsch). Aber mir choenne ersch am Samschtig izieh. D.h. nomol e wuche do in dr Jugi wo me vo 10-3 nit ins zimer cha (numme ins uffenthaltszimmer) und wo me mit 17 anderne imne zimmer schloft. Freu mi mega uff mi zimmer!
Zuedaem bini jetz no chrank, aso eifach verchaeltet. SWaetter do isch naemlich raecht gwoehnigsbeduerftig. Amene normale Tag schient min. eimol dSunne und min. eimol raegnets. Huet isch grad bsunders chalt *frier*
Huet isch grande fiesta do a 12i hets e regatta gha so e art drachebootrenne wo 8 verschiedefarbigi boeoetli gegenenander gfahre sin. Jedes Boeoetli isch usseme andere dorf/stadt cho und ueberall sin au no grad alli bewohner in de entspraechende Farbe mitcho... gwuessi haen sogar no chleini guggemuusige oder so wie Gligge (mit trummle und irgendwelchne floetli) mitgnoh wo denn musig gmacht haen... ich bi fuer di gruene gsi. (die rote und die blaue sin dFavorite gsi, haemmer vonere rote erfahre). Will si je zu 4. gsi sin weissinit woes schlussaendlich gwunne het aber die gruene sin in ihrere gruppe natuerlich die schnaellschte gsi :-)

DStadt do isch megaschoen, ich mein scho dLag ellei isch unschlagbar und si sin wuerklich nit richtigi Spanier do, es isch alles raecht suuber uff de stroose und so :-). Ha sogar Luet beobachtet wo e platiksack oder e stueck holz ussemene brunne zooge haen zum futschmeisse! und dHueser, het vieli alti hueser und vieli mit tuermli und balkoenli und teraessli.. eifach schoen.

Morn muesi unbedingt mol dInformatik Fakultaet go aluege und denn mol mit mim erasmus verantwortliche in kontakt traette, denn bruchi no e velo (het ganz viel tolli velowaeg do, und ich choent em strand entlang ind Uni fahre!!! :-D
und neui schueh, e raegejagge.. und und und.. ich glaub richtig zur rueh chummi ersch wenni alles mit wohnig und uni und so greglet ha...

so das isch jetz riesig lang worde... liest oebber ueberhaupt alles das?
fuer die wos gschafft haen an daere stell no ganz e liebe gruess!